我也不想這樣

其實今日我心情真係好差，又係為左同我老公解唔開嘅問題，而內心感到多方面的鬱鬱不樂！我知道冇人幫到我，我嘅不快樂唯有等它慢慢走吧！

真係覺得自己好煩，可能自己真係有太多壓力啦、包括工作、錢、債務，婚姻、我個仔，所有野都搞到我好煩呀，好想全部都可以唔要，自己一個鐘意點就點，無錢咪無錢囉，過簡單無野諗嘅生活就算啦！鍾意點都得。不過講完哩番說話，心裏面都知道係冇可能，我都唔想咁！我想要嘅係真係咁咩？其實有時都唔知自己想點樣...................可能痴左線掛。

我回來了

                             足足個幾月冇開過哩個網誌，係哩個幾月我做左好多野吖!首先要講
就係係上個月比我個朋友煩得好緊要，叫我去上甚麼面對人生價值堂，探索自己喎，連
續5天盛為5800，不過係我朋友出錢的，上完個5天嘅堂我只會覺得搞哩門生意嘅人，真
係好成功，可以揾到咁多人心甘情願賣命地做義工職員幫手，同時又吸納一批又一批新
嘅成員入左哩個所謂充滿坦誠及有愛嘅地方，坊間稱哩D堂為洗腦班，而我個人亦都覺
得係，但當我上完哩5天后我發現哩D被洗腦中毒嘅人有一個共通點，就係鐘意放大人生
經歷過嘅一D唔事去睇，而搞到自己好似好慘咁！簡直低能，我當然係冇被洗腦嘅小部
分人啦，大部分十分認同哩個中心搞嘅課程嘅人，佢地已經又放低左10800又去了第二
階段，有二自然有三，又有完成第二階段嘅去左三，要放低左8800！完成第三階段嘅佢
地自然成為永久義工職員，不斷帶朋友去，不停講不停叫你去上堂，你去啦幫到你嫁！
怪不得哩個中心營運了16年之餘仲係其他地方都有分校啦，台灣、昆明、澳門、香
港.................真厲害！不過老實講體驗完哩個課程，令我覺得個一群人本身都係有問
題的，感覺佢地都比較負面負能量，怨天尤人但自己又唔努力，來來去去唔係講男女感
情、婚姻有問題、同屋企人關係唔好、工作唔如意唔順利等..........大佬吖，人就梗係
有可能會有遇到哩D問題嫁啦，睇下自己點處理姐，D人講完自己嘅故事之后，好似突然
間覺得大家處境好相同咁，大家要一齊面對一齊改變，突然係個5天變左好深交嘅朋友
咁，我真係覺得好奇怪！我有個係讀大學讀心理嘅朋友，佢都話哩D係用捉心理嘅方法
搞得好成功嘅生意！如果我嘅小生意都可以咁成功就好啦！哈哈..................

又大一歲了

上星期係我生日，人開始長大生日也不覚得係咩一回事，可况仲做左人阿媽，梗係個仔生日緊要D啦！哈哈！仲要我個仔啱啱都過左生日，我地兩母子也同時長大了。 今日都因工作比較忙，都冇精神繼續寫，但心裏面其實都有好多野想抒發下，真係力不從心要趕住訓，聽日仲要又早起，還是goodnite 吧！

麥當勞

M記真係一個好地方，任坐幾耐，睇書、吹水、師奶阿婆阿伯，各有各做自己野！我今日都參與一份，因為今日冇揸車搭車去接仔放學，又早左半個鐘，唯有就搵地方等時間過啦，不過我唔係淨坐冇幫襯嫁，我有買野食，食完野坐係到玩電話之餘又𥄫下周圍，真係覚得好好笑！平時自己有幾何會坐係度呀！個種感覺好攪笑！見到D人會同隔離枱搭訕交談！對面個婆婆係到好忙咁打機，我自己就係部電話度寫寫寫！

谷氣

                                       有時對住我阿媽真係好火滾 , 雖然我咁樣講阿媽都知係唔啱 ,但係真係谷到爆炸!對住我阿媽離唔開兩個問題 ,錢 & 揍仔 , 話說其實我阿媽一直都唔想幫我揍仔,成日個口都嗌住話好似坐監咁,咩都做唔到,邊到都唔洗去 , 但係其實我阿媽咁多年以哩都唔洗返工做野 , 都算係半全職主婦 , 佢嘅生活費全部係人地比佢嘅 , 以前就係我同母異父嘅細佬嘅爸爸照顧佢 , 到早近哩8年都係由我負責 ,因為佢地離婚 , 我要比佢嘅生活費係好似請一個初級美容師嘅人工 ,足超過八千元 , 到早几年佢見到我阿姨做嫲嫲 , 佢又吹我話不如你都早Ｄ生啦 , (趁媽咪仲後生可以幫你揍嘛!) 有哩句說話就當然放心啦 , 諗住阿媽咁撐我 , 我又真係信佢先 on X 呀! 係哩4年裏面 , 已經好似長期比人摙住條頸咁 , 因為自己又落手落脚日日要砌客跟客 ,跟本冇時間揍到仔 ,收工都 9 點幾啦 , 又話一個星期要揍足5日半冇曬時間冇得去街 , 種種埋怨理由 , 最后就係要加添 2 千人工 , 先可以平息哩件事 , 但係錢亦唔係可以完全解決問題 , 到過左一年到,我擴大左我公司請多左幾個人 , 佢又而為我好得閒唔洗做 , 每個星期仲有一兩日叫我 4,5點返屋企 , 佢話要去街 , 我心諗你冇野呀,成日以為我唔洗做 , 佢癲嫁 !我諗住比多小小錢阿媽 ,阿媽幫我揍仔等自己可以放心努力工作 ,點知仲慘過請工人 , 早知係咁錢到可以比小Ｄ佢唔佢揍 , 橫掂屋企都有個工人係到 ,都唔知幾氣頂吖 !不過講真呀我又唔放心將一個 b b 仔單獨比工人照顧 ,唉.........所以咪比我阿媽摙住我條頸 3年多 !所以哩幾年我已經為今日做好準備 安排好公司嘅運作 , 請夠人去做野 , 請到人去跟野 ,我唔需要留係公司 , 公司都 run 緊嘅 ,我就變左係后面做計劃嘅 , 因為我預左等到 bb讀 K3嘅時候 , 我會好似而家咁 , 都算全職揍 , 只係星期一至五早上到下午個幾小時做公司野之后就揍佢 ! 點知都等唔到出年 , 今年就要行哩個 plan ,原因係離唔開我阿媽越哩越離譜 , 日日都叫我早 d 返早d返 , 另外一邊就係阿仔而家會講好多野 ,之前逢星期六晚佢返屋企訓嘅時候佢會同我傾計 , 佢話:媽咪呀,點解你唔揍我遮 , 我想日日返屋企呀 , 咁我唔開心嫁 ! 唉.............阿仔講到咁我都好心酸 , 所以先將 K3嘅 plan ,提早一年進行 !

                                  8月13日就係 K 2 嘅第一日 ,係早一星期前我阿媽突然又問,咁阿 B 返學之后你點安排呀?咁我就梗係食住條水問 , 你都唔想揍嫁啦 , 佢又話揍呀 , 唔揍唔同我返工咩 !頂呀 ,聽到佢話返工仲慶 , 我心諗你話返工?你洗做野嘅咩 ? 你只係會擺我同阿妹D錢 !(咁樣話阿媽真係好不孝 ) 但係哩個係事實 ,其實佢問及講咁多都係想知我會唔會減佢份人工 ,因為佢知阿仔轉返全日班學費再貴左 ,因為冇學券係私校 , 咁我都好直接話係呀 , 哩緊我自己揍返 , 我開支又大左又唔洗你揍 ,我會比小幾千 , 其實小左幾千對我阿媽都冇影响 ,佢D錢唔需要交任何開支 , 剩係交佢自己手提電話費 , 其餘0開支 , 只係用哩去玩去威 ,仲有我細佬係特殊兒童政府每月有傷殘津貼 , 我阿媽每月多 3千自己洗足足洗左20年有多 , 但係細佬係由我同阿妹照顧的 ,所以我減佢幾千唔太過份吧 !仲有我阿妹每月又比 2 千佢 , 所以都唔洗擔心佢冇錢用 !
其實講咁耐都唔係最慶 , 本來佢話佢都想揍 ,但係我都唔太信佢 , 咁我地傾好話只係逢星期五叫佢幫我接阿仔放學返屋企 , 咁我就唔趕住走可以做公司野 , 逢星期五夜Ｄ先收工 , 因為我公司有做打激光及彩光療程 , 只有我一人係有牌 , 我已經train 到我2位 fit d 嘅同事可以操作激光 , 但係因為彩光比較難控制 , 所以都會係我處理返 , 所以同我阿媽傾左叫佢只幫手個日 , 開頭佢話好 ,到上星期三我同佢講定星期五我有光要打 , 根住佢係度依依哦哦話 , 我個日要去party喎!
嘩!嗰吓直頭慶到想殺人 , 同你傾好左你應承我,我先會安排我嘅野 , 轉頭你又係咁我係做野唔係去街喎?阿大哥!當時我梗係忍住啦 , 我即刻又問咁下個星期五同以后嘅星期五 , 你係咪真係得呀 ? 佢又話係 , 好!我又 on x x 真係又信你 , 咁上個星期五個打光booking 都改左 ,都可以再安排第 2 日 , 好彩已full pay左 , 只係補打送嘅遮 ,都不太影响 !

                          最火嘅事要嚟啦 , 星期一我同佢講話星期五晚我約左 x x 食晚飯一齊慶祝生日食餐飯 , 佢都識我朋友係細個嘅同學仔 ,我地同年同月同日生嫁 ,識左到而家有15年 平時好小見面 , 傾下電話多,只係生日前食餐飯傾下咁 , 我阿媽又即刻話 , hea...........我個日唔得喎 , 我約左邊個邊個呀 , 跟住我話咁你之前又話哩個禮拜可以揍 b b ?我先約人炸 , 佢話: 哦!咁好啦,你去啦去啦 , 玩下啦! 我又話: 我唔係去玩呀 , 生日一齊食飯炸 !

                           好啦,以為講完講清楚啦 , 咁我應承我朋友話 ok ,食早 d 費事咁夜返 ,琴晚我再confrim 多次,我話聽日我車左bb返哩我就出去 , 佢又話: 吓 ,我聽晚約左 x 姨食飯喎 , 我真係忍唔到開口爆左佢一句 , 你得就得唔得就唔得 , 我應承左人地嫁 ,你唔得我就推左人啦!根住我成晚冇彩佢 , 佢問我野我好簡單一個字咁應佢 , 雖然我知咁樣係好唔啱 ,但係琴晚我心裏面已經同自己發誓 : 我以后都唔會再叫佢揍 , 個仔係你嫁 , 你自己諗掂佢啦! 所以我就立刻決定左今晚帶埋阿仔一齊去 , 如果唔係我老公收工晏 , 我一定唔會再問我阿媽 !哩幾晚我阿媽係我地哩邊訓 , 所以我成晚見到佢都好氣頂 , 我諗我個樣塊面都幾西 , 雖然我冇出聲 , 但我見到佢個樣翁口翁面 , 大概知道左我今次能再忍佢 , 到左再夜Ｄ嘅時候 , 我陪阿仔訓完 ,出返廳睇晚間新聞時 , 佢特然又同我講 , 咁啦聽日我 bb 你唔洗推左人地 ,你去啦 ! 我即回佢一句 : 唔洗啦 ,我會帶埋 bb 一齊去 ! 跟住就講完 !我有我玩電話睇電視 , 佢有佢忙自己野 !
但係我諗今次我有排都唔會應佢 , 雖然我咁做好孝 , 但係我阿媽對我做過嘅野我已經不能再忍 , 唔係因為佢唔幫我揍仔 , 佢周圍係人面前講我 話我 , 最慘佢唔係講事實 , 自己加鹽加醋講到我對佢好差 , 仲有太多太多不能再忍嘅事 !真係好過份 ! 不過我知道即使佢又幾過份我都要原諒佢 , 鬼叫佢係我老母咩! 我老公夠過份啦 ,我咪又係要冇野 ,可況個個係生我嘅人 !唉...........................頂住呀!阿芮。



                                 

攰死人啦

都快有一個月冇寫我哩個網誌啦，因為都真係忙到不得了，上個月仲為緊同我老公嘅野都已經煩到爆，都係唔會解得開嘅問題，就只怪我沒有勇氣吧！本來哩一個問題都未煩完，係我嘅工作方面又面臨危機，都只怪自己唔好唔夠成熟，將自己嘅負面情緒帶埋返工，冇心機做野，連帶成盆生意一齊向下，都只怪自己錯啦，搞到公司條數跌得好慘，最後就係搞死左自己！係今個八月就唔容許有咁嘅情況 ，仲要博命加鞭追追追！好彩直到今日為止成績已做過基本線，仲有八日希望可以再超越做到再高嘅成績！

       除左要為公司嘅野做好準備而攰得要死外，係今個月嘅13號開始，我嘅生活工作時間直頭又走左去人生再再另一階段，就係負責返每天全日揍仔，真係攰到呢...阿仔今個學期讀K2,我幫佢轉左全日班，返8：45放4：45，上個學期k1返半日班，每天都係我8：15送返學，12點接放學就係我阿媽接手，連帶全晩全日跟我阿媽，我只需每朝去我阿媽屋企帶阿仔返學就搞掂，收工幾夜返屋企、去街隨時夜晚幾點行都no problem!但係...而家冇哩支歌仔唱啦！而家朝早帶完仔返學一早返到公司，D時間唔知做乜鬼過得特別快 ，一天嘅時間好快就到4點，哎呀！救命呀，手上嘅野都未做好又要收工走人，劈住去接放學，放學返到屋企同佢冲涼、食小小野、睇做功課、再睇學拼音嘅碟，睇到我自己覚得好悶呀！唉！明明有好多公司嘅野想做，都做不得！好彩我唔洗煮埋飯炸，如果唔係我會死左！晚飯后又要陪玩一陣，之后9點半又要返入房講故事+陪訓！等阿仔訓左十點半后才有我的自由空間！

精神分裂

話說琴晚都好似講到有結論咁，突然今朝一訓醒又話諗清楚，佢話「我唔想分开，和好如初啦」，係咪痴線嫁？一時一樣，好似精神分裂咁，攪到我自己都好亂，人都癲吖！救命吖~搞到自己心情都好反覆，究竟要点？本身自己又唔能夠果斷做哩方面嘅決定，又容易心軟，又想咁又想咁！定係搞到最后都係無結果！還是時辰未到呢？只有一個字形容哩刻無奈嘅感覺「唉...」

選擇

琴晚八號加十號風球我同朋友去左唱K，玩到今朝六㸃幾先返家，今晚又因為想避開唔想咁早返屋企見到佢，我又啱啱兩點要返到，但係佢竟然未訓等我，我同佢談判歷時個半鍾，得出嘅結論係一大堆對我無理嘅指責，話我收工夜、冇人煮飯、係屋企悶、對我有不滿唔妥我條氣唔順，所以就要出街搵朋友！我覺得實在太離譜！我唔知可以講乜，一個家大家二人都有份，我努力工作為了大家將來，相反佢係各方面零付出而想要得到大回報，我只可以講一句：請你返火星吧！ 對住溝通唔到嘅人，聽佢講出一D歪理時，我個心好難受，深深感受到咩叫做兩個世界嘅人！真係好攰唔能夠寫出所有當中嘅對話，最后嘅答案佢又話:咁我儲夠錢下個月中會搬+咁幾時簽紙？我個心即時抽實！同埋冇野再講！ 真係好唔明白點先可以令佢明解我嘅想法，不過我自己都知佢哩世都唔會明！其實最終決定權都係我手，我想揀冇事照舊如事咁過又得，選擇要堅決分開亦得！我究竟係想前定後，連自己都猶豫！祈求所有嘅天神、天父、菩薩，你們給我力量、勇氣及給我方向吧！

長期戰爭

今日係第五日嘅作戰 , 我同佢巳經冇電話聯絡,只係係屋企會見到大家,仲要都唔係日日見到,因為佢會依舊若無其事好似攞正牌咁去街夜返,面對哩種處境,我真係覺得好鬱結,好想得到一個徹底解決嘅方法,無奈我唔夠勇氣,左諗右諗,唔知及唔明白係咪真係要顧忌咁多,定係我其實唔想選擇個種辦法而比自己諸多籍口去逃避!

我不夠堅強

這幾天心情仍然好沈重，真係唔知可以點，都唔知點解要咁煩，可能一想到要改變，心裏頭最真個個都係話唔想，但係要接受，自己又知道真係不可能！唉...點解我會咁冇用嫁，又想咁又唔想咁，真係好廢！其實如果自己代入一個局外人去睇返自己嘅情況，講真唔洗諗啦！哩D咁嘅人要唔要都算啦，個仔有冇哩個爸爸都冇所謂啦！其實都去到咁嘅地步，仲要留戀甚麼呢！人地話如果一個人得六十歲命，我已經過左一半，但係係個一半嘅路里面，同一個咁唔懂得照顧自己嘅人一齊已超過個半裏三分一多D嘅時間，講真唔開心多過乜，係咪仲要咁嘅方式行埋下半條命嘅時間？係咪應該要改變下呢？真係好多餘，唔知自己點先可以跳到出嚟！fuck!

單身

真係好希望自己係單身一族，雖然哩個稱號難免會比人感覺係孤伶伶的一羣，可能以前比而家更天真嘅我，一樣會覚得一個人會好孤單好寂寞，但係現在的我真係好想好想一個人，做咩事都唔需要向人交待，做咩決定只要係自己想點就點，唔需要有任何顧慮，現在的每一個決定也不只影響我一人，真係好辛苦，唔知點樣嘅決定先啱，我知道冇人幫到我，但係唔知可以點做，又唔可以同人講，即使講左又點呀！真正嘅我其實係想點呢？本身我有選擇障外，係選擇做決定嘅時候需要較長嘅時間，好彩對於工作方面嘅事我可以好果斷，可以好快決定咩係我想要咩係我唔要嘅，但係工作以外所有其他嘅野，我都真係下不到決定！真係無奈+無助，哩種咁嘅感覺已經冇出現過好耐，因為每當我知道我心裡面有一個決定擁現嘅時候，而我又唔想去面對，個種心痛心酸眼淚就一齊哩到，係我自己欠缺勇氣去面對，但又好唔想繼續係咁，再加上一諗起我地之間問題會影響到第三個人，我更加感到難受，一諗到哩到又會覺得個仔嘅感受先係最重要，所以又停下來了！

印尼庸工

請到一個好嘅工人真係唔容易，我自己係哩4都換過成六條印尼妹，當中都有唔同嘅case，偷錢嘅、思鄉病嘅、偷煙食嘅、話掛住條仔嘅、惹我阿媽討厭嘅、唔鍾意香港嘅....簡直係笑料！可能我同D工人無緣掛！不過諗真應該係間僱傭公司質素問題！啱啱朋友先煩緊個工人姐姐同自己阿媽夾唔到，個姐姐要砍炮唔撈，𢴇曬行李即走，聽到都鄧佢頭痕，佢比起我更加需要工人，因為佢有兩個小孩，大嘅九月準備要返學，細嘅先得九個月大，工人姐姐同婆婆就一人睇一個，本來佢姐姐要走都唔大影響，因為佢都冇返工成年幾兩年，三個大人照顧兩個細夠曬人啦，佢就係諗住人夠自己都諗住做返野，幫補下屋企等老公唔洗咁辛苦，仲要傾好曬應承好下星期就返工，點知殺出個姐姐要走，真係頭都大！可能佢都係同我個間僱傭公司，所以D工人姐姐都係麻麻地！可能係哩D細行收嘅手續費太平，搵返哩D印尼人質素都係劣D，真係一分錢一分貨，平野冇好，可能真係冇講錯！哈哈...所以今次真係要去德成女傭啦！手續費貴D就貴D啦！ 雖然而家我屋企冇請工人，我請D工人又唔係幫我揍仔，所以我都冇咁急，但係如果下次再請我都諗住試下德成女傭~＂佢都係我同行喎＂德成女傭融入家中，哩句野入曬腦吖！

請給我能量

                    這幾天真係忙得要死及攰到死，早個四五日忙做貨set場嘅清潔阿姐，因為公司其中一間鋪位於早個多月前遭業主狂加租，要將鋪位一開二再分租先可以租得起繼續營運，所以公司要重新裝修，裝修完我哩位打雜梗係有排開工幫手搞衛生啦，攰到阿媽都唔認得呀!終於大功告成，剩返小小手尾，不過應該都可以好快搞掂!

 

                 搞完哩樣又有第二Ｄ野再搞，琴晚都搞到半死咁濟，就係我考試要交嘅野, 又一次證明我個人分配時間,真係好有問題,成日將Ｄ野拖到最尾死期到前一日先做 , 我真係要決心Ｄ改過先得啦 !唉..............真係好攰呀 , 好想大叫出哩 , 仲有排做希望星期六前我會完成啦~

 

反省

      話咁快又到月尾，哩個六月又BYEBYE 囉! 唉仲有3日咋，

欠小小先到 basic sales target，今日真係要好認真諗好計仔先得

啦，雖然平時都唔係玩玩吓，不過都比較懶散，要預早準備嘅

野又遲遲都未做好，但會發現自己好似只會逢月尾個星期先特

別急，咁咪衰格囉！我自己係，對我另外兩位擔大旗嘅同事當

然亦唔例外啦!唔知 "人"哩種動物，係咪真係要被人迫先得嘅

呢?我講緊係我自己呀，雖然冇一個實實在在嘅人迫過我，但

逢到每月20號起，迫我個個人就會出現嫁啦，因為好多數接住

嚟要找，其實我諗自己已經習慣左，過今日開始我要求突

破，無論係對自己還是我的每一位同事，另外兩位大粒嘅同事

我更唔會鬆手例外啦！鬼叫佢地份人工多過其他人咩，係要開

始學吓感受吓小小嘅壓力啦!

好呀!今日我小芮話嘅，哩緊嘅七月份，我要認認真真啦，唔

好再 hea 住行啦!唔好再臨急抱佛腳啦!再過多個零月小芮又年

長一歲啦 ! 希望係我步入 3 字頭嘅第二年 , 我有一番新境象吧!

好好理財

         昨日同朋友通電，知道佢老公係大陸盤生意搞到一鑊粥咁，公司比人封廠比人告，一個

partner走佬，一個推御責任，最惨好多揹上身嘅野全部都係佢老公個名，天啊！乜有人真係

咁無所謂嫁咩？乜都唔清楚就用晒自己名負責，真係慘！不過最慘最煩嘅都唔及我個friend佢

老婆煩啦！聽得出我朋友煩係因為諗緊條數要跌幾多，欠下人家嘅賬係過百萬，佢話向銀行

借都要同佢老公搞返掂筆數！佢老公搞生意時草落嘅錢用曬不但只，而家仲要欠咁大條數，

知道佢真係好唔開心，因為本身我地係一D窮等人家長大又讀唔成書，屋企又唔係有錢人家

好彩我好友係一位理財有道嘅小富婆，有時覺得佢真係好叻，草錢真係有一手，大家同

年同月同日生一樣大嫁，我地都係八十後一族，不過佢比我叻好多，佢係早幾年已經買左

樓，仲要唔止一個單位，係舊年仲買多一個單位比阿媽同阿妹住，真係好叻好勁好令我慕

呀!佢以前都係打份文員工一萬蚊個月，都係近哩3、4、年先轉行做美容，打左年零工之后就

自己同人part住開左間美容院，已經有2間啦!唉..........有時覺得自己都幾嘥時間，起步創業已

比同年嘅朋友早，入哩行嘅時間又比同行嘅朋友耐，我17歲就接觸哩個行嶪，8年前我都係得

個23歲，已經明白與其比老細日踢夜踢要我又做得又跑得，倒不如我自己跑條數比自己，所

以先開左第一間嘅小小美容院，哈哈.............可惜我冇好好珍惜時間及機會，冇好好為自己將

來打算過，揾到嘅錢就用呀洗呀買呀食呀去玩呀，全部用有幾多用幾多，冇儲蓄!咁咪就係死

囉，唯一可會讚賞自己嘅，就係對於哩個行業我會斷咁進修，所有要識要學嘅國際認可資

格我都有去報讀報考，無計啦讀書又唔多，希望自己嘅職業有專業認可資格及擁有哩方面

嘅專嶪知識，我係一個美容全壘打，我仲曾經做過2年全職化粧師添，識做識吹理論識SELL

嘅，哈哈哈..........不過而家仍不斷進修中 (管理學及培訓師)

我有時會跟我哩位朋友傾吓叫佢教我草錢，但係佢分享佢儲蓄嘅方法，以前聽嘅時候我

覺得簡直係慘無人道！what ? 檸檬茶同一本$10嘅雜誌都唔買得，日日返工放工，唔去街唔行

街唔去玩，咩錢都唔洗，除左比家用阿媽之外，其餘咩錢都不能多用，以前我嘅感覺係 (咁我

生存為乜呀，不如乜都唔好做!!) 但係哩幾年我先終於明白咁辛苦咁慳就係為左而家囉！

死蠢! 學我阿妹話齋可能我係駝仔時盆骨生闊左連帶個腦筍至生埋左！個腦近哩幾年先開始

用！經過同朋友琴日嘅傾談后，又令我明白儲蓄嘅習慣係幾咁重要！換轉係我老公生意失敗

我都愛莫能助，因為自身難保!今天開始我要再加倍努力努力，好好再為我嘅下半生打算，

人地話一個人有60歲命，咁我仲有時間呀，加油努力吧~芮芮

迷惘

有時候會諗而家我所做的事是我想要的嗎？可能埋藏係我心深處嘅壓力，我想並非每個人可以頂得到，講緊嘅並唔係單指我嘅婚姻，對於我嘅工作其實都幾大鑊，本身由細到大我嘅算術都係勁差，差到無人有，至小三開始我嘅數學科係0分，去到會考仍然係u,即使重讀第二年嘅中五數學會考都係u,從來都冇變！早知咁差當年就咪鬼side阿媽錢啦！重讀都要洗多幾皮野嫁，嘥鬼氣！對於數字可能我真係有障外，我真係連加減數心算都唔得嫁，好彩有計數機哩樣野！哈哈，對我哩講＂計數機＂真係偉大嘅發明呀！哈.... 其實我唔係想講計數機對於我有幾重要，我想講嘅係一個數學白痴數口蠢鈍嘅人學人做生意？會唔會係有問題呢？雖然我搞嘅並唔係D咩大生意，都係做女人仔生意嘅行業，但係成日需要接觸到數字嘅遊戲，set plan,promotion,set course，轉plan收錢補錢等等..會唔會其實我一路都計錯數呀？點解好似每個月都入不乎支嘅？唉...有時都好心灰意冷，會反問自己我係咪提供緊就業機會呀？定係我自己食左豹子膽向銀行借大左，所以搞到D數亂七八糟呀？但係明明個個月都有進賬嫁，有時自己都唔知發生咩事！可能人地睇我覚得你就好啦，咁快就唔洗落手落腳做咯，好正啦咁爽！其實我心諗你地都白痴嘅，我係冇用手搓D客塊面啫，唔代表我咩都唔做會有生意嫁，唔一定成世要摸住搓住人地塊面先至係做野嘅！雖然以前都係由我自己一個人一對手做起，大佬呀一對手比盡你裝左摩打咪做得8個booking,做得嚟又sell唔到，唔比人轉形式嘅，雖然我係小公司但係而家一日可以排到有30幾個booking,唔係應該好過以前咩？有時一諗到哩D問題自己都好矛盾，又或者自己一個人做嘅時候所有野都嚟得輕鬆得多，不過一個人做嘅營業額又唔可以跑到哩個數啫，無其他人分工，一個人又做得幾多呀？自己有時好似痴線婆咁係個心到自問自答，因為我身邊好似冇人明咁，我阿媽、老公，表面好似好支持咁，有時比佢地知道資金週轉唔係咁順，佢地唔體諒仲會話：係咪無得做呀？全部都有病嫁，生意係會有高有低嫁啦！長期爆數你咪好發！可能上巿添啦！最黑人憎係又唔係問你地借，有時傾開講下啫，一話有時唔係咁好就叫人唔好做，唔做唔做今年就哩都八週年啦！一諗起佢地哩D說話就無名火起！ 總之最好乜都唔好講！所以有時真係好無奈...

快樂的兩日一夜

琴日嘅情緒係晏晝嘅時候突然爆發，可能個天又突然好陰暗，搞到我突然感到好無助哭了出來！不過都係流左D幾行眼淚后又冇事Lu,因為我枱面有好多野等緊我處理，因為逢星期六我會提早收工，要趕住返去接我個仔，因為我個仔逢星期一至五喺係跟婆婆訓，我收工夜同埋佢跟婆婆夜晚餐飯先食得好，如果我湊佢就乜鬼都唔食，如果我阿媽去旅行個仔跟我，我阿媽去完旅行返哩接返我個bb,阿婆就話：嘩瘦左咁多嘅？不過事實我阿媽真係冇吹水，阿BB真係咩都食得小D嫁，塊面仔會明顯縮小左，哈哈真係誇張呀！所以只有逢星期六晚+星期日，我先會同阿仔相處多D，星期一至五我地只得半小時見面，就係每朝早我同佢老豆車佢返學！所以我地會好珍惜哩兩日一夜，好似每個禮拜宿營咁！無計啦鬼叫要搞好公司咩，如果唔係我都想全職湊佢，可以睇住佢成長，其實由阿仔出世后第三個月開始，我地就玩左咁耐宿營啦，除左我阿媽去旅行又或者係新年，其餘日子都係玩宿營，不過好彩我同阿媽住得好近，行過去十分鐘啦！ 係哩兩日一夜係我每個禮拜最開心嘅時刻，無論係工作帶比我嘅煩惱定係同我老公有嘅問題，我都唔會諗亦唔會提，因為係阿仔面前我唔會對佢態度太差，因為係半年試過有次鬧交要講到離婚，當時阿仔都係度玩緊玩具，夜晚訓覚時阿仔同我講：媽咪，人人個個都有爸爸同媽咪嫁嘛！我聽住佢咁講個刻我心好酸及不其然流出眼淚！真係奇怪一個3歲嘅小孩會知道咁多？所以以后就算我有幾唔妥佢老豆我係阿仔面前都唔會有野咁，佢老豆同我講野我又要應佢，如果唔係阿仔又會問：做乜唔采爸爸呀？為左阿仔我唔想影響佢嘅情緒，咩事都係哩兩日一夜變得無問題！令我最開心無煩惱無壓力就係同我個BB阿仔一齊！我地準備出街啦！

時間唔夠洗~

唔知點解時間好似日日都唔夠用咁，究竟係我個時間管理得唔好，定係我哩個大打雜真係好多野做呢？本來琴日心情仲好差直至返工前，我都仲係好鬱悶咁，加上一早又天黑黑灰灰暗暗咁，一時又太陽一時無端端密集式嘅大雨，連個天都弗弗地，猶如我心情一樣！不過返到公司開始好似一路都有好多野忙咁，所以連原先好鬰結嘅心情都忘記了！ 今日忙左好多樣野，又去左好多地方，但係係今日咁忙嘅時間，都有比我病發嘅空間，哈哈哈...不過我今日買嘅衫褲鞋全部都係屬於我個寶貝仔嘅，買得好開心呀！不過放工返到屋企見到個位兄台就唔多好，對住哩D軟皮蛇嘅人，簡直係好似參加左個D耐力鐵人賽咁，對住佢都唔知可以比咩反應佢好，已經當睇佢唔到嫁啦，仲可以當若無其事咁問野傾計，佢都白癡㗎！我就真係應唔到佢啦！其實我都冇諗住理佢，因為我自己都攰到爆炸，仲要頭先啱啱先搞掂所有人7月份嘅亡命更表，睇到隻眼要痴埋咁制，好彩終於完成！但係排好更表，聽日又有其他大單野，仲有8日哩個月完啦，要叫D同事開行turbo先可以搞返掂條數，如果唔係就死得人多啦！所以聽日要抓繄時間好好準備哩幾日用咩箣略先可以達標！我要加油呀，無謂嘅人及無謂嘅野，我都無暇兼顧吖！

到底有誰能夠告訴我

面對哩種問題嘅時候，我有時真係覚得進退兩難，唔知自己究竟想點，亦唔知道可以點！其實我好怕向我家姐、朋友講及關於我同我老公之間嘅問題，好似係一個永遠都解唔開嘅結，究竟係個結打得緊？定係我自己扯緊嘅呢？好似永遠都搵唔到個平𧗾點咁！我只知道我好討厭佢哩種行為，但係佢係永遠都唔肯變，其實我都明白人嘅性格係改變唔到，我已經比曬方向佢自己揀，但揀好又唔肯做，我可以點呀？？？

我的底線

                     其實究竟我有冇底線嘅呢?我又覺得自己係好有原則嘅人,但係偏偏我老公對我做嘅野,我可以忍完又忍,講左唔好再係咁跟住又重覆再係咁,其實由拍拖到結左婚又有埋個仔,係哩12個年頭裏面,佢對我所做過嘅講過嘅，講完應承左又唔做嘅，無論係我身邊嘅朋友、家人都冇一個話可以再忍！唉...............鬼叫而家又有個小朋友，唔去到最壞一步都唔想搞到個仔變左係單親家庭長大，但係有時我又會反問自己:(咁咩事先至屬於係最壞一步呢?)其實最壞一步係咩標準咩定義呢?講真所有係一個男人唔好嘅野，其實係我身邊嘅哩位兄台已經做過曬，唔通最壞一步嘅意思係，要我親眼見到佢同第二條女人係張床上面嬉戲先為至係"最壞"? 不過我相信佢又未必會咁易比我見到，所以我自己有時都覺得哩Ｄ問題好煩，我唯有選擇逃避都幾克意唔去諗，一認真去諗嘅時候 , 我嘅情緒真係會好down好down!本身我係一個喊包 ,我可以喊足一整天 , 可能有人未必會信 , 但我真係可以諗完又喊 , 喊完又喊 , 收晒眼淚隔一陣又嚟又喊 , 所以我真係唔咁再為左哩Ｄ感情問題而影响我太多 , 有時都好想好想衝出去 , 想改变唔想再係咁 , 我好清楚而家嘅我想要Ｄ乜 , 除左要揾錢改善所有人嘅生活需要質素及滿足我嘅購物病態 , 其實我真係好想要一個可以懂得照顧我嘅男人 , 講緊嘅唔係用錢哩照顧 , 係揾到一個識用心去照顧 , 方向一樣 , 溝通到傾到計 嘅人 , 無奈太遲啦 , 哩種諗法都係係哩一兩年先擁現 , 我個仔都四歲啦!鬼叫自己以前太天真 , 冇用腦去諗過 , 所以都唔知可以點!唯有就係咁........................

定時的債

今日19號聽日就20號！唉..凡到每月嘅20號，心情自不然煩躁、焦急、緊張，所有負面嘅情緒擁現，不過我諗真係無人睇得出，咁煩就梗係擔心就到月尾啦，公司條大數仲未達標，剩返十日唔知追唔追到，雖然到月底都可以做到但係每個月個種擔心嘅感覺，其實都真係唔好受！究竟係為左咩呢？有時都真係會諗，點解我要背上這個大擔子？我有好強嘅事業心？我喜歡做老板？定係咩呢？為左想追求好嘅生活？為左家人？為左個仔？？？總之就係為左要搵多D錢啦！都係為左生活啫..... 所以我成日同自己講，困難會過嘅，錢會慢慢還曬嘅，只要努力D就得啦！所有問題都可以解決嘅！

天生購物狂

有時我真係懷疑自己係咪有病呢？每個月總會買鞋買衫，最弊我每個月都唔係話買個一件半件，計起上嚟每月總會用左人地成半份人工去買鞋買衫，當一般人有萬二三蚊人工，我就用左成半份咁，唉！都唔知點先可能㩒住我哩團購物火！無理由嫁，人地話有左小朋友，自己會將D錢留返買野比個仔，但係我個仔都就快四歳，而我好似都冇停止過，認真大件事！唔知係咪工作帶比我有無形嘅壓力，買衫買鞋，我真係開心到飛起！哈哈...由三月起到而家，我已經買左12對鞋，超過左100件嘅衫+褲！可能我真係有病！希望我個病下個月可以醫返好啦！要停一停啦！祝自己成功啦！實在太過份啦~

第一次

今日係小妹初次學人寫blog,我諗以後就有個地方可以盡情咁講出我心所想！